(1) SINGO MANDONGKAK
JO TAKUAK KACANG GOREANG
Singo mandongkak namonyo ukia
Ukia di papan nan sakapiang
Dirumah gadang sulangko gadiang
Di dalam lumbuang nan bapereng
Asa di Agam Balai Gurah
Kiasan jago pado adaik
Ingek-ingek sabalun kanai
Sadio payuang sabalun hujan
Ingek-ingek nan di ataeh
Nan di bawah kok mahimpok
Baitu kieh ibaraitnyo
(02)
CARANO KANSO
Carano kanso namonyo ukia
Siriah gadang lingka-balingka
Balingka jo arai pinang
Batukuik dulamak kaco
Kuniang sacoreng
di atehnyo
Pananti sutan
jolong pulang
Sajamba makan
mairiangnyo
Latak diateh pintu
biliak
Suko rayo raso dipakai
Sanang siat puti bakuruang
Cupu bakaran basusun nyato
Santo timbakau
pakaian adat
Latak di dalam
carano kanso
Suatu talatak di
tampeknyo
Ukia dikarang
tampuak tangkai
Pakaian balai nan saruang
Pariangan jo Padang Panjang
Ukia tuo ukia usali
Warih dek anak Indo Jati
Warih nan indak putuih
Tutua nan samo kito danga
( 03 )
SIRIAH GADANG
Siriah gadang siriah balingka
Kuniang sacoreng diatehnyo
Baaleh batadah tampan
Hulu adat kapalo
baso
Pangka kato hulu
bicaro
Panyingkok peti
bunian
Pambukak biliak
nan dalam
Susunan dari Priangan
Buatan Parpatiah Nan Sabatang
Tidan nan turun dari ateh
Balingka jo mufakat
Balingka jo limbago
Jadi pusako alam nangko
Latak diateh pintu
biliak
Dijujuang jo
mufakat
Dipikua kato baiyo
Barundiang sasudah makan
Batanyo salapeh arak
Siriah gadang manjadi punco
Anak kunci dalam
hetongan
Tando adat badiri
nyato
Nan tampak sirah balingka
Isinyo adat jo pusako
Bapahek diateh papan
Baukia ditimbago
Bacacak ateh batu
Manjadi pado zaman
Tando biti adat
bapakai
Tinggi nan amban
jantan
Dalam juo takasiak
bulan
Pandai ukia di
timbago
Pandai pahek pado kayu
Disitu hati mako sanang
Dilahia manahan
bandiang
Di bathin manahan
tiliak
Nan nyato nampak
di mato
Nan bathin dibawo
raso
Distulah latak makna siriah
Siriah sahalai nan bagagang
Gagang barangkai jo bungonyo
Bungo nan elok katiruan
Disinan tiruan
adat
Di situ limbago
tumbuah
Laweh dikambang ka alam nangko
Kucuik saleba daun siriah
Kok rimbun tampak di junjuangan Urek malakek di rumpunyo
Aka mancakam masuak tanah
Kok lah tampak
siriah balingko
Mangundang pintak
dengan pinto
Siriah naiak junjungan naiak
Baitu dandamnyo
siriah nantun
Lakek di papan nan balariak
Ukiran di rumah gadang
Lukisan adat jo limbago
Jadi pakaian di istano
Manjadi suri
tuladan kain
Umpamo ragi nan
tadendeng
Dalam bathin budi
marangkak
Lahianyo kayu nan
balariak
Bathinnyo limbago
cupak adat
Adat limbago tempat diam
di alam Minangkabau
Alam takambang jadi guru
( 04 )
BADA MUDIAK
ITIAK PULANG PATANG
Elok susun bada mudiak
Manyonsong aia samo sakato
Arak baririang samo saraso
Indak saiku nan mayalo
Saiyo sakato
bakayuah mudiak
Tuah di ateh nan
sakato
Cilako kato
basilang
Dilukih diateh
papan
Diukia di rumah
gadang
Rumah gadang sandaran adat
Adat di alam Minangkabau
Indah nian tampak dimato
Raso dibawo turun
Dilahia bada nan
disabuik
Di bathin adat jo
limbago
Kieh ibarat caro Minang
Adat nan samo kito pakai
Tempe manempe ukia gadang
Salo manyalo dan nan banyak
Baitu latak ragam
ukia
Alua patuik,
barih balabehnyo
( 05 )
TATANDU MANYASOK
BUNGO JO BUAH NIBUANG
Tatandu samo manyasok
Bungo satangkai kambang nyarak
Dibuek ukia langkok-langkok
Susun barangkai tatandu bararak
Buah nibuang sato bararak
Bararak sarato jo putiaknyo
Indah ukia jo tatahnyo
Ragam sarato indahnyo
Papan sabalik kagunonyo
Pita jo pilin kabatehnyo
Ukia sabalik nan tampak nyato
Adat bajalin di dalamnyo
( 06 )
LUMUIK HANYUIK
Aka lapuak gagangnyo lapuak
Hiduik nan indak mamilihah tampek
Asa lai lambah inyo lah tumbuah
Dalam aia bagagang juo
Aia hilia lumuik pun hilia
Walau tasalek di
ruang batu
Baguba
babondoang-bondoang
Aia bapasang lumuik
Bapiuah namun hiduik bapantang mati
Baitu untuangnyo lumuik
Indak mancari
tampek diam
Hanyo manompang
jo aia hilia
Indak mamiliah tampek tumbuah
Asa kasampai ka muaro
Usah cameh badan
kahanyuik
Baguru kito
kalumuik
Alam takambang jadi guru
Lahianyo lumuik nan
disabuik
Bathinnyo adat Minangkabau
Dilariak di papan
tapi
Ukiran rumah nan
di lua
Gambaran adat hiasan alam pusako salamonyo
( 07 )
BUAH PALO PATAH
Rancak raginyo buah palo
Dikarek disusun nyato
Elok tampaknyo pandangan mato
Ukia tuturan tumpuan kasau
Balampih jo itiak pulang patang
Basalo jo tatandu manyasok bungo
Raginyo dama tirih bintang gumarau
Baitu tatah lataknyo ukia
Dalam barih cupak adat
( 08 )
TAJI SIAREK
Papan gadang baujuan ukia
Ukia bataji jo siarek
Talatak di papan pereng
Buliah di lumbuang nan bapereng
Baik di rumah nan baanjuang
( 09 )
PARUAH ANGGANG
Paruah anggang kaluak bakaluak
Mangkuto di ateh ranggah
Suntiangan buruang di rimbo
Runciang saragam pisau lariak
Pambuek ukia panca ragam
Pakakeh tukang ukia maukia
Tumbuak manumbuak rasuk jo paran
Disinan baukia pamalanggang
Di ujuang papan tumbukkan kayu
Pereng mamereng kayu gadang
Ujuang maujuang kayu taba
Sanan talatak paruah anggang
Baitu suriah barih adat
( 10 )
SALANGKO
Rumah gadang silanko gadiang
Salajang kudo balari
Sawah gadang lumbuang bapereng
Pereng banamo silangko gadiang
Baitu barih balabehnyo
Pereng baukia jo silangko
Baujuang simanggih karek
Talatak di papan taba
Kan ganti ukua dengan jangko
Pambateh didiang sasak basusun
Latak di ateh tampek nan tinggi
Indak buliah karandahan
Ukia banamo ukia tuo
Samo tajadi ju lumbuang nangko
Samo tadiri jo rumah gadang
Samo naiak jo galombang
Samo turun jo gapocong
Indak baumpuak bakeh tumbuah
Gadang tabawo dek pungkamnyo
Tinggi tabawo de ruehnyo
( 11 )
AKA TANGAH DUO GAGANG
Sipasan baranak jantan
Anaknyo baranak pulo
Anak jadih induakpun jadih
Anak manjadi induak pulo
Alam bakalebaran
Manusia bakakambangan
Lukisan alam Minangkabau
Ada barasa di Parianagn
Nan samo naiak jo galombang
Samo turun jo kapocoang
ukia gambaran alam bakalebaran
Diukia di kasau gadang
Baitu cancang tarahnyo
( 12 )
BUNGO PANCA MATOHARI
JO RANTAK MALAM
Panco ringek di tapi jalan
Mati-mati mako babuah
Ingek-ingek anak bajalan
Lauik sati rantau batuah
Bungo matohari kapunco ukia
Rantak malam lingka ba lingka
Gayo mantohari nan jadi rasiah
Corak bulan mancari aka
Dipetak, ukia dibuek
Mancari tenggang jo kalaka
Maragam bungo sari manjari
Baitu alam salingka laweh
Alam takambang jadi guru
Buliah maukia jo maragam
Malukih adat jo limbago
Pakaian alam saisinyo
( 13 )
KUCIANG LALOK
JO SAIK GALAMAI
Bakirim usah
bapitaruah
Bapasan usah baturuti
Manyuruah usah bakahandak hati
Bana lai picayo tidak
Pitaruah baunyikan juo
Itu nan labiah rang pantangkan
Ukia ragam kuciang lalok
Salo manyalo saik galamai
Latak dipucuak dindiang hari
Disingok di ujuang paran
Parannyo ulua mangulampai
Asanyo di Gudam Balai janggo
Di dalam Koto Pagaruyuang
Ukiran Rajo Tigo Selo
Pikia-pikia mangambang kato
Kato rahasio baandokkan
Simpan bakeh nan picayo
Lamak usah dimakan sajo
Rancak usah capek dilakekan
Ingek dirantiang kamancucuak
Jago di unak kamanaruang
Lalok usah talalu mati
Manyuruak usah talalu hilang
Lamak manih raso galamai
Dalam gatah minyaknyo tumbuah
Ingek dibadan kabinaso
( 14 )
PESONG AIA BABUIAH
Bulek kato dek mufakaik
Bulek aia dek pambuluah
Alua jo patuik tagak ditangah
Bana nan satu panyudahan
Sapuluah kelek ditampuah
Sabaleh lauik jo buiah
Namun bana hanyo sabuah
Pesong babuih puputan kaliang
Sabuah ujuid jo mukasuik
Dilengong ka suok jo ka kida
Dipakai baso jo basi
Dalam raso jo pareso
Aia luluih aia lah tingga
Bana lalu hetongan tingga
Nan janiah buliah diminum
Nan karuah lalu ka hilia
Ukia nan turun dari Saruaso
Payuang panji alam Minangkabau
Basa Ampek Balai nan punyo ukia
Baitu warih nan bajawek
Bapasang di singok jo pasarek
Dindiang hari tupai managun
( 15 )
SIKUMBANG MANIH ( I )
Kambang manih bungo nan mulia
Timbalan bungo sari manjari
Dicaliah gunung maha biru
Batangkai babuah labek
Balingka baaka cino
Silang bapiuah di salo daun
Buah manih satandan labek
Mainan bundo, simpanan puti
Panyaru dagang di rantau
Pananti alek nan datang
Ukia diulak Tanjuang Bungo
Pakaian Ranah Minangkabau
Latak di muko adaok halaman
Ukia nan tagak surang
Puti bakuruan jo aturan
Baitu warih di Gudam Balai Janggo
Kambang tigo buatan tukang
Indah di dalam maliputi
Adat nan nyato bakambangan
( 16 )
SIKUMBANG MANIH ( II )
SIKUMBANG MANIH ( III )
SIKUMBANG MANIH ( IV )
SIKUMBANG MANIH ( V )
Kambang manih bungo nan mulia
Timbalan bungo sari manjari
Dibaliak gunung maha biru
Babuah babungo pulo
Rajo Bajalan badaulat
Pangulu bajalan basisampiang
Balingka baaka cino
Silang bapiuah kri kanan
Panyalo buah jo putiak
Palingka bungo ka kambang
Kambang manih kulindam suto
Bujang Salamat duo sairiang
Urang dalam suruah suruahan
Patuah nan indak basisiah
Salo manyalo di ukiran
Sisampiang tibo dipakaian
Bitu arak iriangannyo
Baitu barih curiangnyo
Aturan di Ulak Tanjuang Bungo
Bapakai di Gudam Balai Janggo
Ikutan alam saisinyo
No comments:
Post a Comment